Yn 2007, yn 16 oed, ymunais â’m llu Swyddfa Gartref lleol fel Cadet yr Heddlu. Cefais fy nghyflogi’n llawn amser am 2 flynedd, gan gael cipolwg gwerthfawr ar bob agwedd ar Blismona a pha yrfaoedd a fyddai’n agored i mi yn y dyfodol.
Yn dilyn y profiad anhygoel hwn, ymunais â'r un llu fel PC yn 2009. Treuliais 7 mlynedd ar Blismona ymatebol rheng flaen. O fewn yr amser hwn, roeddwn i;n ddigon ffodus i gael babi gyda fy ngŵr, a oedd hefyd yn rheng flaen, yn gweithio o'r un orsaf. Mae gen i lawer o atgofion o drosglwyddo ein merch yn y swyddfa pe byddai un ohonom i ffwrdd yn hwyr, a gwneud 3 sifft nos yn olynol ag uchafswm o 3 awr o gwsg. Nid oedd yn hawdd cytuno ar oriau gwaith hyblyg bryd hynny, ac roedd rhaid i ni frwydro drwodd gyda'r hyn a gynigiwyd i ni.
Ar ôl 7 mlynedd, anaf ar ddyletswydd a’r brwydrau yn dilyn hynny, gadewais yr Heddlu'n gyfangwbl i redeg fy musnes fy hun yn y sector addysg. Roedd hwn yn gyfnod gwych o ddysgu persbectif hollol wahanol ar fywyd. Fe wnaeth y daith ddysgu hon addysgu i mi y gallwn i fynd yn ôl at yr hyn rwy’n ei wybod orau, Plismona, a dechrau gwneud newidiadau cadarnhaol.
Roeddwn i am gael her newydd o fewn llu newydd yr oedd ei werthoedd yn cyd-fynd â fy ngwerthoedd i. Roeddwn i'n ddigon ffodus i ymuno â BTP ym mis Ionawr 2022 fel ail-ymunwr. Roedd y broses ymgeisio'n syml, a chefais y wybodaeth ddiweddaraf am y cynnydd ar hyd y ffordd. Roeddwn i'n gallu cysylltu â'r Rhingyll ar y tîm roeddwn i'n ymuno ag ef a gwnes i ychydig o ymweliadau cyn i mi ddechrau.
Ymunais â Thîm Tasgio bach, lle bydden ni'n defnyddio cymysgedd o ddillad plaen a Phlismona amlwg i frwydro yn erbyn materion penodol ar hyd llwybr penodol. Roedd yr ymgyrchoedd hyn yn llwyddiannus iawn, a gwelwyd llawer o droseddwyr, megis y rhai a amheuir o ymosodiad rhywiol, yn cael eu hadnabod, eu harestio a'u dwyn gerbron y llys yn gyflym. Byddai ein gwaith yn cael ei gydgysylltu â thimau eraill megis CID, timau ymateb ac adrannau arbenigol, a fyddai bob amser yno i gael cyngor pan fo angen.
Yr hyn a ddarganfyddais yn gyflym iawn am BTP, yw bod staff a swyddogion yn cael eu parchu’n gyfartal, ac yn cydweithio’n eithriadol o dda. Cefais fod y llu wir eisiau datblygu pobl a rhoi cyfleoedd iddyn nhw archwilio eu hangerdd. Dw i wedi gallu mynd ar ymlyniadau ag adrannau y mae gen i ddiddordeb ynddyn nhw a dw i'n dal i gael fy nghefnogi nawr i ddilyn fy nyheadau gyrfa yn y dyfodol. BTP yw’r lle cyntaf i mi deimlo ymdeimlad mor gryf o bawb yn cefnogi ei gilydd, gan annog twf a datblygiad. BTP hefyd yw’r lle cyntaf i mi deimlo fy mod i wedi cael cefnogaeth wirioneddol fel rhiant, ac fel rhywun â chyflwr iechyd cronig hirdymor. Drwy gydol fy ymweliadau ysbyty a llawdriniaethau niferus, mae fy nghydweithwyr wedi bod yno i fywiogi fy hwyliau, a gwneud i mi deimlo mai dyna yw hanfod ‘teulu’r Heddlu’ mewn gwirionedd. Dw i wedi cael cefnogaeth dda ag addasiadau i’r gweithle pan oedd angen hyn, ac alla i ddim diolch digon i’r rhai o’m cwmpas am eu cefnogaeth ddiwyro barhaus.
Dw i bellach yn rhan o’r Tîm Recriwtio Gweithredu Cadarnhaol, a’m nod yw gwneud BTP yn llu dw i'n gwybod y byddai’n gofalu am fy mhlant fy hun, pe bydden nhw'n dilyn yn ôl troed eu rhieni. Dw i'n gweithio gyda'r Gymdeithas Heddlu Benywaidd a Gweithgor Cenedlaethol Endometriosis yr Heddlu. Ar hyn o bryd dw i'n codi ymwybyddiaeth o'r heriau y gall cyflyrau gynaecolegol eu cyflwyno i Blismona, a dw i'n edrych i wneud y llu mor gynhwysol â phosibl i'r rhai sy'n dioddef o gyflyrau o'r fath. Ni ddylai bod yn fenyw byth fod yn rhwystr, ac rwy’n falch o fod yn rhan o lu sy’n rhagweithiol wrth gymryd camau i gefnogi rhieni a phobl â chyflyrau gynaecolegol.
Cliciwch yma am restr o wefan wehyddu ar eu gwaith ar hyn o bryd.
